UPATE NI HLIM TAKA HMAN A NI

Nimin October ni 1, inrinni kha Khawvel puma Upate Ni a ni a, Chanmari Upa Pawl Unit chuan Hrangbana College, Golden Hall-ah chawhma dar 11 khan hun an hmang a, Pu C. Lianchungnunga, President, Chanmari Upa Pawl Unit-in a kaihruai. He hunah hian kum 2011 chhunga an member chatuan ram pan tate sunna hun hman a ni a, nupa la damte kum 60 chin tuak 2 hnenah Diamond Jubilee Certificate pek a ni a, kum 50 dam dun mi 5 hnenah Golden Jubilee Certificate pek a ni bawk. Hei bakah kum 10 leh a aia tam Chanmari Upa Pawl a Office Bearers tang mi 3 hnenah HOTU MIN Certificate pek an ni. An member kum 80 leh 90 chin chunglam te hnenah lawmpuina thilpek hlan a ni bawk.

Chanmari Upa Pawl Unit-ah hian hian member 232 awmin mipa 106, hmeichhia 126 an ni. Heng zingah hian Patron Member 63, Life member 7 leh Annual Member 162 an awm. Nimin report-a a lan danin kum 90 chin 3, kum 80-89 chin 47, kum 70-79 chin 84 leh kum 69 hnuai lam 98 an awm a ni. Zoram Upa Pawl (ZUP) hi kum 1960 khan din a ni a, a hming hi kum 1992 khan Mizoram Upa Pawl ti a thlak a ni. Kum 1976 khan Chanmaria Unit din a ni a, President hmasa ber chu Pu K. Kaichhunga (Pu K. Thangzuala pa) a ni.

JH.REMLIANA KAN THEN TA

J.H. Lalremliana, kum 68, Sec-IV, Presbyterian Kohhran hi 10 June, 1943 khan Pu Nghaka (L) leh Pi Hualthangi (L) te fa palina ni turin Durtlang Hospital-ah a lo piang a. An unau hi 8 an ni a, chungte chu -
1) Thanchunga (L) h/o Lalbiaksangi, Dawrpui
2) Thanchami w/o Dunglena, Laipuitlang
3) Lalzikpuii w/o Malsawma, Saron Veng
4) JH Lalremliana h/o Romawii, Chanmari
5) Rosangpuii w/o Liansailova, Chanmari
6) Lalchhuana h/o Saichhungi, Chanmari
7) Thandingliani , Chanmari
8) Thansangzuali w/o Lalzuithanga (L)

August ni 25, 1974 khan Romawii nen Rev. Robawiha kutah an innei a. Fapa 2 leh fanu 2 neiin, tu 7 a nei bawk. A fate:
1) Zonghaksanga h/o Zorinpuii, Ramhlun Venglai
2) Zonunthara h/o Lalsangliani
3) Vanlalhruaii (L)
4) Lalhriatkimi w/o Dr. VL Remsiama, Chanmari West.

Pu JH Lalremliana hi pa zaidam, mi huatthu sawi hlau tak, tawng tam lo, titi thiam a ni. Nupui fanau te leh tute hmangaih mi a ni a, a nupui fanaute ngaihsak leh uap lum duh mi a nih avangin Kohhran leh khawtlang lamah pawh duh angin a inhmang thei tam lo. Naupang a ngainain a tute leh dangte pawhin an ngaina hle a ni.

A pa hi sawrkar hnathawka hmun hrang hranga a awm kual avangin Pu JH Lalremliana pawh hian a pa a zui zel a, hemi avang hian a sikul luhna pawh a in sawn a ngai thin a, M.E. sikul hi thingtlangah leh Boys M.E. sikulah te a kal a, 1965 ah Matric St. Paul’s High School atangin a zova, 1969 ah B.A. a passed bawk.

Zirna lam a zawh hnu hian zirtirtu hna thawkin Baktawng leh Ngopa ah te a awm a, Zirtirtu hna a thawh lai hian School Education Department hnuaia Adult Education Wing hnuaiah Circle Adult Education Officer hna hmu in, he hna hi rinawm leh taima taka thawkin Mizoram hmun hrang hrangah te a zin kual nasa thin hle. Pathian hruaina leh khawngaihna azarah a hna atang hian 2009 khan a pension ta a ni.

Pu JH Lalremliana hian thisen sang leh zunthlum te a nei thin a, he a natna hian harsatna em em a thlen lova an hriat laiin 2010 atang khan damdawiina awm hial te a lo ngai ta a, damdawiina amah enkawltute chungah a lawm thei em em thin a ni. Aizawl Civil Hospitala hun engemaw chen enkawl a nih hnuah in lamah te inenkawl chhovin a tha viau a, thenawm khawvengah leh veng danga chhungte dam lo tlawh te pawhin a kal fo thin a ni. 2011 August thla khan Awmvel natnain a tlak buak a, in lamah enkawl a ni a. He a natna hi a dam fel hnuah 30 September zan khan a insawisel leh a, a tuk 1 October (inrinni) zing dar 9 vel khan Civil Hospital panpui a ni a, Hopsital an thlen hnu rei lo teah Chatuana chawlhna tur Lalpan a buatsaihah chuan chawl hlen turin chawhma dar 10 khan min lo boral san ta a ni.

ROCHHUNGA KAN THEN TA

Rochhunga (94), Sec-IV, Presbyterian Kohhran hi unau 6 zinga naupang ber leh mipa awmchhun niin 10th May, 1917 (German râl rûn kal kum) in Chhingchhip, Lal Hrangliana khuaah a piang a. A pa chu Kawlhnûna Ralte Kawlni, a nu Chinawii Paihte a ni. An unau upat dan in dawt in hetiang a ni:-
1. Zatluangi (L) 2. Manthangi (L)
3. Mankungi (L) 4. Nuthluaii (L)
5. Lianchâni (L) 6. Rochhunga
Ni 13th Jan, 1936 (Thawhtan) ah Sangkungi Renthlei nen Pastor Chhawna kutah an innei a, fa 11 (Mipa - 4 leh hmeichhia - 7) an nei a, an upat dân indawtin :
1. Chalmawii (L)
2. Rochhingpuii (L)
3. R.Sangkhumi (L) w/o C. Sangkunga
4. R.Lalhmingliana h/o Lalhmangaihi
5. Vanlalhruaia (L)
6. Vanlalvuani Ralte w/o Thantlinga (L)
7. Lalramhluni
8. Lalbiakliana (L)
9. Upa R. Lalhmangaiha h/o Dr. H. Malsawmi
10. Zoremsangi (Nuteii) w/o Rozâma Sailo (L)
11. R. Lalthlamuani w/o Dr. R. Lalthanga
Ni 4th Feb, 1921 ah Pastor Hauchhunga kutah Baptisma a chang a. Zu far khat pawh a in lo a ni. Lehkha a zir sang lo hle a, Sunday School-a chhiar a zir bâk chu chawhma chiah school a kal. Zir Tan Bu leh Zir Tirh Bu hi a lehkha zir ve chhun a ni. Pathian malsâwmna a dawng a, ziak leh chhiar a thiam a, Bible hi vawi 13 (Lehlin hlui - 12; Lehlin thar - 1) a chhiarchhuak a, ama Typewriter a chhuin lehkhabu bu 6 lai a siam ve.

1939-ah Chhingchhip atangin Khawbêlah an pem a, an chhangchhiat lai takin khawtlangah dinhmun hrang hrang : Y.L.A. leh Signal Pawl-ah President kum 10 chhung niin Lal Upa kum 8 a ni a, Village Council Member a ni tawh bawk. 1940 khan a hovin Tlangval Inkhawm an nei a, nula hovin tel ve an châk avangin Thalai Inkhawm vuahin Kohhranah chak takin an ding a, kum 10 chhung zet Zaipawl Conductor a ni a, 1942 ah Kohhran Upa-ah thlan leh nemngheh a ni.
Kum 1951-ah Chhingchhipah an pem let leh a, 1952-ah Kohhran Upaah an thlang leh a, kum 69 zet Kohhran Upa a ni hman a ni. Kohhran, Bial, Presbytery, Synod thlengin a phâk ang tâwkah committee hrang hrangah dinhmun pawimawh tak tak a chelh hlawm. Ama dil pawh ni lovin Chhingchhip-a Damdawi In hawn thar tur atân Civil Surgeon-in Chowkidar atan a rawn appoint a, chu chu kum 60 a nih, 1977 thleng khan a thawk.

Patê inbuan chak, pa taima leh hnathawh chak tak a ni a. Mawl taka Pathian ring bur mai, a rinna nghing ve ngai lo a ni. Pathian a rin tlatna hi a tu leh faten eizawnna kawngah malsawmna tam tak an dawn phah a ni. Kum 90 a nih kumin Computer a zir tan a, Zonet Cable TV in a chenna inah panin an interview hial a ni.

A fate Aizawl lama an awm vek avângin 1981 khan Chanmari-ah hian an pem thla ve ta a. Chanmari M.U.P. ah hian 1984 atangin Office Bearer ah kum 10 - President, Vice President, Financial Secretary leh Senior Adviser-ah te a tang a, Office Bearer-a kum 10 tang zawn certificate a dawng bawk. M.U.P. Headquarters Committee-ah kum 6 chhung a tel bawk. Chanmari Kohhranah pawh hian Puitling Sunday School zirtirtu, thuhriltu, committee hrang hrang member nihna chanvo a chelh bawk. Kum 60 chhung thuhriltu a ni a, kum 50 chhung Sunday School zirtirtu tangte chawimawina dawngin kum 59 a thawk hman a, bawrhsawmna avangin chawlh a dil zawk a ni. Bible Society-ah Chief Patron Member a ni bawk. Pathian Ramah sawma pathum a pe ta a ni.
A nupui hian 1998 khan a boral san a, a lunglen êm avangin hla lungkuai zet mai a phuah nghe nghe a ni.
Kum 1986 atang khan a biangah Nerve na in a tibuai tan a, Guwahati Neurology Centre panpui a ni a, tihdam mai theih a nih loh avangin a thih ni thleng hian ni tin damdawi a ei thin. Hemi kum vel atang vêk hian Asthma a nei tan a, vawi tam tak Hospital hrang hrangah luhpui a ni a, that tak tak nei lovin in lamah a theih ang anga enkawl zui a ni a. Hetianga natnain a tlâkbuak chung hian midang tâna malsawmna nih a tum tlat a, thil dang a tih theih loh hnuah pawh awmhmunah lensuah a sa a, mi 132 a pe hman. Kumin March thla vel atang khan Nerve na leh Asthma natna bakah hian a taksa pum a thak a, a taksa tih lumin a thak a chhuak a, tih vawhin a Asthma a chhuak bawk si a, enkawl thiam a har hle a ni. Zawi zawiin a hniam hret hret a, Presbytery Inkhawmpuiah te tel châk êm êm leh tel tuma a inbuatsaih laiin Inkhawmpui tâwp ngai tawh lohna leh kal a châk êm êmna a Lalpa hnenah ni 29th September, 2011 (Ningani) 12:00 Noon khan a chawl ta a ni.

FC.LALTHANTLUANGA KAN THEN TA

FC. Lalthantluanga (34) s/o Lalramliani, Sec-IV hi July ni 5,1977-ah a lo piang a. Nikum 2010 khan thluak TB avangin Newlife Hospital-ah thla hnih chhung enkawl a ni a. In lamah kum khat leh thla hnih chhung enkawl chhunzawm a ni. Kumin September ni 26 khan thawhah leh kal na avangin Newlife Hosital- ah admit leh a ni a, doctor leh nurse ten theihtawp chhuaha an enkawl chungin September ni 28, nilaini khan chatuan ram min lo pansan ta a ni.

LOCAL FOOTBALL TOURNAMENT KHELH ZAWH A NI

Pu R. Lalhmachhuana te chhung, Sec-III in an fanu boralta hriatreng nana an buatsaih 1st Vanlalrohlui Memorial Football Running Trophy 2011, June ni 4 atanga tan chu June ni 6, thawhtanni khan AR Lammualah zawh a ni ta.

Final-ah hian Auss FC leh Khiiitah FC te intumin Auss FC hi 1-0 in an chak. Auss FC hian trophy leh Rs. 3,000 an dawng a, Khiiitah FC hian trophy leh Rs. 1,500 an dawng bawk.

Best player-ah Tv. Lalthantluanga (Tataw-a), Auss FC chu thlan a ni a, Trophy leh Rs. 500 a dawng a. Best Goal Keeper-ah Tv. Lalawmpuia (Op-a), Auss FC thlan niin Trophy leh Rs. 500 a dawng. He intihsiaka vawi 5 pet goal-tu Tv. Rochhingpuia (Buaisuh FC) chu Top Scorer an thlan niin Trophy leh Rs. 500 a dawng bawk